Tirsdag og onsdag denne veka var Bergen Næringsråd vertskap for den årlige samlinga for alliansen Næringsforeningene i Norge.
Heile 109 næringsforeiningar frå heile landet, med til saman 28 000 medlemsbedrifter, var samla i Bergen til den årlege samlinga i regi av Næringsforeningene i Norge.
Volda Næringsforum og Ulstein Næringsforum deltok frå Søre Sunnmøre, og fekk med seg to inspirerande dagar fylt med fagleg påfyll, erfaringsdeling, nye kontakter og moglege samarbeid.
Samlinga er den viktigaste møteplassen for næringsforeiningar i Noreg. Her fekk deltakarane høve til å utveksle erfaringar, drøfte arbeidsformer, dele inspirerande prosjekt og presentere løysingar på felles utfordringar.
Næringspolitikk var eit sentralt tema gjennom dagen, spesielt med tanke på det komande stortingsvalet. For å få fram ulike politiske perspektiv, var representantar frå fleire parti inviterte til paneldebatt. Både Høgre, Framstegspartiet, Senterpartiet og Kristeleg Folkeparti løfta fram betydninga av stabilitet og føreseielege rammer for næringslivet, og understreka behovet for å sikre nasjonalt eigarskap. Formueskatten på arbeidande kapital må fjernast. Dette er avgjerande for utviklinga av små og mellomstore verksemder i heile landet.
Samstundes vart det sett søkjelys på fleire andre aktuelle tema, som til dømes korleis ein kan tiltrekke seg rett kompetanse, grøn omstilling og skape livskraftige tettstader og sentrum.
For Volda Næringsforum var det spesielt verdifullt å møte foreiningar frå kommunar med liknande struktur og utfordringar. Vi fekk gode døme på korleis ein kan styrke samarbeidet mellom kommune, utdanningsinstitusjonar og næringsliv – noko vi i Volda allereie er i gang med og vil utvikle vidare.
Vi tek med oss ny kunnskap og nyttige kontaktar tilbake til vår Volda.
Takk til Bergen Næringsråd for eit profesjonelt arrangement, og til alle deltakarar for inspirerande samtalar. Vi ser fram til å nytte innsikta vidare i vårt arbeid for næringslivet i Volda.
Saman står vi sterkare – lokalt og nasjonalt.
(foto : Bergen Næringsråd)